Өмнөговь аймгийн Баяндалай сумын Наран багийн шинэ багийн төвийн барилга албан ёсоор нээлтээ хийлээ. Тус баг нь аймгийн хэмжээнд 4 удаа шилдэг багаар шалгарч, Монгол Улсын жишиг багийн нэгээр тодорсон юм.
Нээлтийн арга хэмжээнд багийн иргэд өргөнөөр оролцож, “Аварга адуучин” тэмцээн амжилттай зохион байгуулагдаж, энэхүү тэмцээн нь уламжлалт малчны соёлыг түгээн дэлгэрүүлэх, иргэдийн идэвх оролцоог нэмэгдүүлэх зорилготой байв.
Баяндалай сумын хамгийн том нутаг дэвсгэртэй, хүн ам хамгийн олноор амьдардаг тус багт сүүлийн жилүүдэд шат дараатайгаар бүтээн байгуулалт, шинэчлэлтийн ажлууд хийгдэж байна. Үүнд:
• 2022 онд аймгийн орон нутгийн төсвийн 227.3 сая төгрөгийн санхүүжилтээр багийн төвийн шинэ барилга баригдсан;
• 2024 онд аймгийн орон нутгийн төсвийн 135 сая төгрөгийн хөрөнгөөр 20 кВт-ын хүчин чадалтай нарны сэргээгдэх эрчим хүчний системийг суурилуулсан;
• 2025 онд сумын орон нутгийн хөгжлийн сангийн 45.4 сая төгрөгийн хөрөнгөөр багийн соёлын төв, контор болон ахуйн үйлчилгээний барилгуудын засварын ажлыг хийж гүйцэтгэсэн байна.
